Psa 8 | CebAPD | STEP | Ginoo nga among Agalon, ang imong pagkagamhanan makita sa tibuok kalibotan! Ginadayeg ang imong gahom dinhi sa yuta hangtod sa kalangitan.

Psalms 8

Ang Pagkagamhanan sa Dios Makita sa Tibuok nga Kalibotan

1 Ginoo nga among Agalon,
ang imong pagkagamhanan makita sa tibuok kalibotan!
Ginadayeg ang imong gahom dinhi sa yuta hangtod sa kalangitan. ^{▼▼Ginadayeg… kalangitan: Dili klaro ang buot ipasabot niini sa Hebreo nga teksto.}
2 Gitudloan mo ang gagmayng mga bata sa pagdayeg kanimo,
aron maulawan ang imong mga kaaway nga buot manimalos.

3 Kon motan-aw ako sa langit nga imong gihimo,
ug makita ko ang bulan ug ang mga bitoon nga imong gibutang sa ilang nahimutangan,
4 makapangutana ako sa akong kaugalingon,
“Unsa ba ang tawo nga gitagaan mo man gayod siya ug bili?
Tawo man lang siya, nganong ginakabalak-an mo man gayod siya?”
5 Gihimo nimo siyang ubos lang sa mga anghel, ^{▼▼mga anghel: o, Dios.}
apan imo siyang gipasidunggan nga daw hari.
6 Gihimo mo siyang tigdumala sa imong mga binuhat;
imong gipadumalahan kaniya ang tanang mga butang,
7 apil na niini ang tanang mga mananap:
ang nagalakaw,
8 ang nagalupad, ug ang nagapuyo sa tubig.
9 Ginoo nga among Agalon,
ang imong pagkagamhanan makita sa tibuok kalibotan!